УЛАДЗІМІР   ПАСТЭРНАЦКІ

[2.7.1885, в. Дудзічы Ігуменскага пав. Мінскай губ., цяпер Пухавіцкі р-н Мінскай вобл.— 21.1.1938, Смаленск, турма НКВД]. свяшчэннамучанік. Беларус. Сын Іларыёна Пастэрнацкага*. Пасля сканчэння Мінскай духоўнай семінарыі рукапаложаны ў іерэя (1908). Служыў у Пакроўскай царкве ў мяст. Пясочнае Ігуменскага пав., цяпер вёска Капыльскага р-на Мінскай вобл. З 25.7.1914 памочнік, з 1917 благачынны цэркваў 2-й акругі Ігуменскага пав. Духавенствам акругі на 3 гады выбраны дэпутатам на Мінскі акруговы вучылішчны з’езд. З восені 1932 настаяцель Спаса-Увазнясенскага храма ў мяст. Капыль, цяпер райцэнтр Мінскай вобл. У  сак. 1933 бальшавіцкія ўлады храм закрылі, а  святара неаднаразова выклікалі ў НКВД. Арыштаваны ў сак. 1936. Жонка Наталля (дачка Феафана Сасіноўскага***) засталася з васмярымі дзецьмі. Асуджаны 24.3.1936 да 2 гадоў ППК. У снеж. 1937 нечакана вызвалены, прыехаў у Раслаў Смаленскай вобл., але 14.12.1937 зноў арыштаваны. 5.1.1938 прыгавораны тройкай НКВД за «антысавецкую агітацыю» і як «агент нямецкай разведкі» да ВМП. Расстраляны. У 1999 Сінодам Беларускай праваслаўнай царквы далучаны да ліку святых новапакутнікаў.

Кр.: Памятная книжка Минской губернии; Смоленский мартиролог; НГАБ, ф. 2786, в. 1, с. 67; Житія и Жизнеописанія новопрославленныхъ святых и Подвижниковъ Благочестія, въ Русской Православной Церкви просіявшихъ (отъ царствованія царя-мученика Николая II Александровіча і до нашихъ дней). СПб., 2001. Т. 2 (августъ-декабрь); Жития священномучеников Минской епархии; Смоленский мартиролог.