ГАЎРЫІЛ (ГОРБАЧ)

[Пётр Дзмітрыевіч; 1881, в. Шалавічы Слуцкага пав. Мінскай губ., цяпер Слуцкі р-н Мінскай вобл. — ?], архімандрыт. Беларус. З сялянскай сям’і. Скончыў Мінскую духоўную семінарыю. Да восені 1922 настаяцель Благавешчанскага манастыра ў мяст. Ляды Ігуменскага пав. Мінскай губ., цяпер Смалявіцкі р-н Мінскай вобл. Потым служыў у Мікалаеўскай царкве в. Трасцянец Мінскага р-на, у Мікалаеўскай царкве пас. Козырава (цяпер у межах Мінска). Арыштаваны 5.4.1933 у Мінску па адрасе: вул. Іванаўская, вуглавы дом, кв. 2. Асуджаны 7.6.1933 са святарамі і манахінямі Мінскай епархіі асобай нарадай пры АДПУ за «антысавецкую агітацыю» дa 5 гадоў ППК. Далейшы лёс невядомы. Рэабілітаваны 12.6.1989 пракуратурай БССР. Асабовая справа Г. № 24819-с захоўваецца ў архіве КДБ Беларусі.

Кр.: БНДЦЭД; Синодик за веру и церковь Христову пострадавших в Минской епархии.