ПАНКЕ Вольга Іванаўна

[1903, Рыга, цяпер Латвія — ?], навуковец. З сям’і рабочага. Атрымала вышэйшую адукацыю. Уступіла ў ВКП(б). У 1933—34 супрацоўніца латышскай секцыі Інстытута нацменшасцей, падрыхтавала (разам з Я.Доўгім) практычны бел.-латышскі слоўнік у памеры 20—25 тысяч слоў. Потым працавала старшым бібліятэкарам БелАН. Выйшла замуж, гадавала дзіця. У час 2-й сусветнай вайны заставалася на акупаванай тэрыторыі. Арыштавана 13.3.1946 у Мінску. Асуджана пазасудовым органам НКВД 27.5.1946 за «здрадніцкую дзейнасць на карысць нямецкіх акупантаў» да 10 гадоў ППК і 3 гадоў пазбаўлення правоў. Этапавана, хутчэй за ўсё, у Маскоўска-вугальны канцлагер НКВД Маскоўскай вобл. 15.9.1954 паводле ўказа аб амністыі ад 27.3.1953 мера пакарання зменшана да 5 гадоў. Вызвалена 6.10.1954. Далейшы лёс невядомы. Рэабілітавана судовай калегіяй па крымінальных справах Вярхоўнага суда БССР 18.12.1959. Асабовая справа П. № 15091-с з фотаздымкам захоўваецца ў архіве КДБ Беларусі.