СКІРМУНТ Алена (Гелена) Аляксандраўна

[5.11.1827, в. Калоднае Пінскага пав. Мінскай губ., цяпер Столінскі р-н Брэсцкай вобл. — 1(13).2.1874], мастачка, мемуарыстка. Вучылася жывапісу ў Вільні ў В.Дмахоўскага. На працягу 1844—45 падарожнічала па Еўропе. Апроч партрэтаў і пейзажаў стварала абразы для касцёла. Займалася скульптурай, вырабіла медальёны з партрэтамі І.Лялевеля, Ю.Крашэўскага. У 1863 везла паўстанцам дэпешу Р.Траўгута. Арыштавана, саслана ў Тамбоў. Пасля ссылкі жыла ў Крыме, дзе выканала гіпсавыя плакеты «Міндоўг», «Гедымін», шахматы ў выглядзе войска Яна ІІІ Сабескага (сярод іх ёсць паляшук). Вяла дзённік, пісала мемуары (на польскай мове). Фрагменты рукапісаў з лістамі апублікаваны ў выданні «З жыцця ліцвінкі, 1827—1874» (1876).

Літ.: PSB; ЭГБ, т. 6-1.