МАРЦІНКЕВІЧ Каміла Вінцэнтаўна

[па мужу: Асіповіч; каля 1837, Мінск ? — пасля 1880, Вільня), музыкант, кампазітар, педагог. Дачка В. Дуніна-Марцінкевіча. Вучылася фартэпіяннай ігры ў Мінску. Выступала з канцэртамі ў Мінску, Слуцку, Кіеве, Варшаве. Уваходзіла ў тэатральную трупу бацькі; у 1852 брала ўдзел у паказе ў Мінску першай бел. оперы «Сялянка». У 1861—63 член мінскай арганізацыі кіраўнічага органа паўстанцаў Літоўскага правінцыяльнага камітэта. Першы раз была арыштавана і змешчана ў псіхіятрычную бальніцу ў чэрв. 1861. Зноў арыштавана 3.2.1863; саслана ў Салікамск (Пермская губ.). У ссылцы ўзяла шлюб з урачом К.Асіповічам. Вярнулася на Радзіму ў 1880-х г.

Літ.: Кісялёў Г. Сейбіты вечнага. Мн., 1963. С. 148—174; Ахвердава А. Пачынальнікі беларускага піянізму // Мастацтва Беларусі. 1985, № 2; Барышев Г. Из истории семьи В.И.Дунина-Марцинкевича // Нёман. 1961, № 1; ЭГБ, т. 5.