Пра пiсьменнiка

Маракоў Леанід Уладзіміравіч — Моряков Леонид Владимирович (псеўданімы: Владимир Моряков, Анатоль Сінчукоўскі і інш.) — журналіст, пісьменнік, гісторык, энцыклапедыст, член Саюза беларускіх пісьменнікаў, правамоцны сябра міжнароднага ПЭН-клуба. Даследуе рэпрэсіі савецкіх (расійскіх) уладаў супраць беларускага, польскага, габрэйскага народаў.

Маракоў — аўтар унікальнага энцыклапедычнага даведніка ў 10 тамах (15 кніг, 9 з якіх былі ўжо апублікаваны) “Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі” у якім прыводзяцца біяграфіі больш за 6000 (шэсць тысяч) расстраляных або загінулых у сталінскіх канцлагерах (ГУЛАГ) дзеячаў беларускай культуры, большасць з якіх вы не знойдзеце ані ў воднай энцыклапедыі.

Маракоў — аўтар не менш унікальнага энцыклапедычнага даведніка ў 2 тамах “Рэпрэсаваныя праваслаўныя свяшчэнна- і царкоўнаслужыцелі Беларусі. 1917—1967”. За незвычайную працаздольнасць даследчыкі называюць Маракова чалавекам-энцыклапедыяй.

Маракоў — аўтар шэрагу кніг прозы. Герояў яго аповедаў (“Непамяркоўныя”, “100 мініяцюр”, “Трое” і інш.) вылучае нянавісць да несправядлівасці, нястомная прага змагацца за волю, за лепшае жыццё. Змагацца да канца, змагацца любым коштам. Нават коштам уласнага жыцця.

Маракоў — аўтар манаграфіі пра свайго дзядзьку, вядомага беларускага паэта і перакладчыка 1920-х — 1930-х г. Валерыя Маракова (любімага вучня Народнага паэта Беларусі Янкі Купалы), расстралянага карнымі органамі НКВД у крывавую для беларускага народа ноч з 28 на 29 кастрычніка 1937 г., калі сталінскія каты ў Мінскай унутранай турме НКВД знішчылі каля 100 дзеячаў беларускай культуры і літаратуры, эліту беларускай нацыі.

Пачынаючы з 1999 г. кнігі Маракова , нягледзячы на вельмі невялікія наклады (аўтар пакуль былі сродкі выдаваў кнігі за свае грошы), няспынна ўваходзяць у дзесятку лепшых кніг года Беларусі.

Пра творчасць Маракова толькі за апошнія 5—6 гадоў пісалі:

Народны паэт Беларусі Ніл Гілевіч;

філосаф, доктар філалагічных навук Уладзімір Конан;

доктар філалагічных навук Алесь Бельскі;

вядомы літаратуразнаўца, кандыдат філалагічных навук Лідзія Савік;

вядомыя беларускія пісьменнікі Уладзімір Дамашэвіч, Анатоль Вярцінскі, Сяргей Грахоўскі (былы вязень сталінскіх канцлагераў, на жаль, ужо, нябожчык) і інш.;

літаратурныя крытыкі Даніла Жукоўскі, Віктар Жыбуль, Ганна Кісліцына, Людміла Рублеўская, Алесь Марціновіч і інш.

Вядомы літаратуразнавец, празаік, публіцыст, доктар філалагічных навук Адам Мальдзіс і вядомы даследчык гісторыі беларускай культуры і літаратуры, грамадскі дзеяч Анатоль Сідарэвіч назвалі працу Маракова подзвігам.

Пра аўтара казалі добрае слова, натхнялі на далейшые пошукі:

Народны паэт Беларусі Рыгор Барадулін;

грамадскі дзеяч, былы Старшыня Вярхоўнага Савета Беларусі Станіслаў Шушкевіч;

доктар гісторыі Янка Запруднік (ЗША);

сусветна вядомая пісьменніца, публіцыстка Святлана Алексіевіч;

доктар філалагічных навук Арсен Ліс;

доктар біялагічных навук, замежны член Нью-Йоркскай АН Вячаслаў Буко;

знакаміты беларускі энцыклапедыст, перакладчык, кандыдат філалагічных навук Янка Саламевіч;

былы рэдактар часопісу “Полымя”, вядомы паэт, публіцыст, грамадскі дзеяч, Сяргей Законнікаў;

вядомы пісьменнік, гісторык Уладзімір Арлоў;

празаік, адзін з лепшых рэдактараў Беларусі Мікола Гіль;

былы старшыня Саюза пісьменнікаў Беларусі Вольга Іпатава;

вядомы пісьменнік, рэдактар, публіцыст, вязень сталінскіх канцлагераў Павел Пруднікаў (на жаль ужо нябожчык);

адзін з лепшых сучасных празаікаў Беларусі, драматург Юры Станкевіч і інш.;

практычна ўсе апазіцыйныя сродкі масавай інфармацыі (“Наша ніва”, “Народная воля”, інтэрнет-выданне “Салідарнасць”, радыёстанцыя “Свабода” і многія іншыя. Дастаткова на любым пошукавым рэсурсе, напрыклад, на GOOGLE набраць імя і прозвішча аўтара.